सध्या महाराष्ट्रात हवामानात सतत बदल होत असून, मान्सूनच्या आगमनानंतर सुरुवातीच्या जोरदार पावसाने काही ठिकाणी दिलासा मिळाला, तर काही ठिकाणी चिंता वाढवली. २४ आणि २५ मे रोजी मान्सूनने जोरदार हजेरी लावली होती. त्यानंतर काही भागांत मुसळधार पावसाचा अनुभव आला. मात्र, हवामान खात्याच्या ताज्या अंदाजानुसार, पाच जूनपर्यंत राज्यात पावसाचा जोर काहीसा ओसरणार आहे. येत्या काही दिवसांत पावसाची तीव्रता कमी राहण्याची शक्यता वर्तवण्यात आली आहे. त्यामुळे शेतकरी वर्गाने विशेष काळजी घेणे आवश्यक आहे.
विदर्भात मात्र पावसाची शक्यता
सध्या विदर्भात वीजेच्या कडकडाटासह मेघगर्जना आणि जोरदार वाऱ्यांसह पाऊस होण्याची शक्यता आहे. विशेषतः चंद्रपूर, नागपूर, यवतमाळ, गडचिरोली आणि आजूबाजूच्या जिल्ह्यांमध्ये १ जून रोजी पाऊस पडण्याची शक्यता आहे. हा पाऊस थोडकाच असला तरी विजेचा कडकडाट व सोसाट्याचा वारा असू शकतो. यामुळे नागरिकांनी आणि शेतकऱ्यांनी सतर्क राहण्याची गरज आहे. या भागात ३ जूनपर्यंत अशाच स्वरूपाचे वातावरण राहील, तर ४ आणि ५ जून रोजी पाऊस फक्त तुरळक ठिकाणी होईल.
मध्य महाराष्ट्रात काय राहील परिस्थिती?
मध्य महाराष्ट्राबाबत बोलायचं झालं, तर सातारा, सांगली, पुणे या जिल्ह्यांतही आज आणि उद्या तुरळक ठिकाणी हलक्या सरी पडण्याची शक्यता आहे. मात्र, या भागात पाच जूनपर्यंत मोठ्या पावसाची शक्यता फारशी नाही. हवामान कोरडेच राहण्याची शक्यता आहे. त्यामुळे शेतकऱ्यांनी मशागतीचे नियोजन करताना योग्य वेळी पावसाचे पूर्वानुमान लक्षात घेणे गरजेचे आहे.
मराठवाड्यात काय राहील स्थिती?
मराठवाड्याच्या भागातही हवामानातील स्थिती फारशी वेगळी नाही. छत्रपती संभाजीनगर, बीड, परभणी, नांदेड, हिंगोली, जालना, धाराशिव या जिल्ह्यांत फक्त तुरळक ठिकाणी हलकासा पाऊस होण्याची शक्यता आहे. ही परिस्थिती ५ जूनपर्यंत कायम राहील. त्यामुळे शेतकऱ्यांनी आताच पेरणी न करता योग्य वेळेची वाट पाहावी, कारण जमिनीचा वाफसा आणि आर्द्रता योग्य प्रमाणात असणे गरजेचे आहे.
कोकणात कशी राहील परिस्थिती?
कोकणातील परिस्थिती पाहता, मुंबई, रत्नागिरी, सिंधुदुर्ग, रायगड या भागांमध्ये पावसाने काहीशी उसंत घेतली आहे. येत्या काही दिवसांतही येथे केवळ हलक्या सरींची शक्यता आहे. मुसळधार पावसाची शक्यता कमी असल्यामुळे समुद्र किनाऱ्यालगतच्या भागात हवामान मुख्यतः उष्ण आणि दमट राहण्याची शक्यता आहे.
गेल्या २४ तासांतील तापमान पाहता, राज्यात सर्वाधिक कमाल तापमान जळगावमध्ये ३९.२ अंश सेल्सियस नोंदवले गेले. चंद्रपूरमध्ये ३७.८, ब्रह्मपुरीत ३८.०, वर्धा ३६.० अंश तर अकोला व अमरावतीमध्ये ३५ अंशांहून अधिक तापमान नोंदवले गेले. कोल्हापूर, महाबळेश्वर, गोवा येथे तापमान तुलनेत कमी होते. उष्णतेच्या झळा अजूनही कायम आहेत.
अशाप्रकारे शेतकऱ्यांनी हवामान खात्याच्या स्थानिक आणि दररोजच्या अंदाजावर आधारित निर्णय घेणे अत्यंत आवश्यक आहे. पावसाची अनिश्चितता लक्षात घेता, शेतीसाठी व मशागतीसाठी योग्य वेळ आणि हवामानाची वाट पाहणेच योग्य ठरेल. हवामान खात्याने सर्वसामान्य जनतेला आणि शेतकऱ्यांना सतर्क राहण्याचा आणि हवामान बदलांवर लक्ष ठेवण्याचा सल्ला दिला आहे.
