आज भाऊ बंदकीमध्ये शेतवाटणीत एक एक इंचावरून भाऊ भावाचा जीव घेण्याचे, कोर्ट कचेऱ्या करून आयुष्यभर एकमेकांचे तोंडही बघितले जात नसल्याचे अनेक उदाहरण दिसतात. मात्र यातच काही बोटावर मोजण्या इतके अशीही कुटुंब आहेत की जे जमिनीपेक्षा नात्याला मानतात. परभणीच्या गंगाखेड तालुक्यातील दहिफळे बंधूंनी शेटवाटणीत असाच एक आदर्श घालून दिलाय, ज्याची चर्चा राज्यभर होतेय. पाहुयात एक खास रिपोर्ट.
शेतकरी भावाला दिला मोठा हिस्सा
परभणीच्या गंगाखेड तालुक्यातील खादगाव येथील रंगनाथराव दहिफळे यांचे कुटुंब आहे. त्यांना 3 मुले आणि 1 मुलगी, नातवंड असा मोठा परिवार आहे. मोठा मुलगा प्रा. डॉ. बाळासाहेब आणि लहान मुलगा प्रा. युवराज हे दोघेही प्राध्यापक आहेत. मधला मुलगा केशव शेती करतात. वडिलांची एकूण 16.5 एकर जमीन, गावात घर, जागा असा प्रपंच आहे. 91 व्या वर्षी वडिलांनी “माझ्या डोळ्यासमोर तुमच्या वाटण्या व्हाव्यात” अशी इच्छा व्यक्त केली. त्यावर तिन्ही भाऊ, त्यांच्या पत्नी, बहीण अशा सर्वांनी घरच्या घरी बसून वाटण्या केल्या.यामध्ये दोन्ही प्राध्यापक भावांनी, स्वतः नोकरीत असल्याने, शेती करणाऱ्या भावाला 16.5 एकर जमिनीपैकी 9.5 एकर जमीन दिली. स्वतःकडे 3-3 एकर जमीन ठेवली. एवढंच नव्हे, तर शेती करणाऱ्या भावाच्या मुलांचे शिक्षण आणि लग्नाची जबाबदारीही त्यांनी स्वीकारली. कुठलाही वादविवाद न करता, अतिशय आनंदात हे सर्व घडले, तेही त्यांच्या आई-वडिलांसमोर.
तिन्ही जावांचा हसत हसत पाठिंबा
सध्याच्या वातावरणात एकत्रित कुटुंब पद्धती ही खुप कमी राहिली आहे. त्यात दहिफळे कुटुंबाने एकत्रित कुटुंब पद्धती तर जपलीच, शिवाय नात्यातील गोडवाही कायम ठेवलाय. एवढा मोठा निर्णय घेताना घरातील महिलांचे विचार जुळणे हे अत्यंत महत्वाचे असते. दहिफळे कुटुंबियातील महिलांनीही या निर्णयाला हसत हसत पाठींबा दिला. आमच्या कुटुंबात आम्ही बहिणीसारखे राहतो आणि जे काही निर्णय घ्यायचे ते सर्व जण मिळून घेतो असे तिन्ही जावा सांगतात..
साडे सोळा एकर मधील जी 9.5 एकर जमीन मधला भाऊ केशव दहिफळे यांच्या वाटणीला आलीय. ती जमीन पूर्णतः पाण्याखाली असुन 2 विहीर बोअर शेतात आहे. शिवाय साडे नऊ एकरमधली आंबराईही त्यांच्या हक्कात आलीय. तसेच मुलगा आणि मुलीचे शिक्षण आणि लग्नही नोकरदार भाऊच करणार असल्याने केशव आणि त्यांच्या पत्नीचा आनंद गगनात मावेनासा झालाय..
गावकऱ्यांनीही केलं अनोख्या वाटणीचं स्वागत
दरम्यान गंगाखेडच्या डोंगररांगांमध्ये वसलेल्या अडीच हजार लोकवस्तीच्या खादगावात विनावाद विना भांडणे केवळ वडिलांनी सांगणे आणि भावांनी ऐकून संपत्तीची वाटणी केली .केवळ वाटणीच नाही तर जो भाऊ आर्थिक कमजोर आहे, त्याला ही यातून उभे केले. ही आमच्या गावासाठीची अभिमानाची बाब असून दहिफळे कुटुंबियांनी दाखवलेल्या मार्गानेच आम्ही चालण्याचा प्रयत्न करू, अशी ग्वाही गावकर्यांनी दिलीय. एकुणच दहिफळे बंधुंनी दाखवलेला वाटणीतील हा सामंजस्य आणि मनाचा मोठेपणा हा वाटणीमुळे कित्येक वर्षांपासून न्यायालयात भांडत असलेल्या भावांसाठी एक नवीन मार्ग मोकळा करणारा तर आहेच, शिवाय नवीन पिढीसमोरही एक आदर्श निर्माण करणारा म्हणावा लागेल…
